CONCOURS :VIVE L'ECRIT

p Te Toere
Prix d'encouragement collectif Reo Maohi
Classe: Classe de 3 ème de Paea
Professeur responsable: Mme Marakai Camelia

I te tau mātāmua, ’ua ora e piti tāne i ni’a i te fenua nō Tahiti. ’O Tū ’e ’o Māui. E piti ’ahuru matahiti tō Tū ’e tō Māui, ’ahuru mā va’u matahiti ia. E tū'ane rāua, terā rā 'aita tō rāua e fa'aeara'a mau, ’ua ora rāua mai te pua’a te huru.

'Aita ato'a tā rāua e vahine nō te mea, e mea reporepo roa rāua, 'aita tā rāua e fa'a'apu. ’E'ita te mau vahine e hina'aro ia rāua. 'Aita rā rāua e tāu'a nei.
I te hō'ē mahana, ’ua haere rāua hi'o i tō rāua pāpā rū'au. Ia 'ite mai te pāpā rū'au ia rāua ia haere mai e hi'o iāna, hope ’ōna i te 'oa'oa, tāu'a parau noa atu ra rātou.

Parau iho ra o Tū e : ’E'ita te mau vahine e hina'aro ia māua.

Parau atu ra te pāpā rū'au : ’Eiaha 'ōrua e ha'apa'o. Ia tae i te hō'ē mahana, e roa'a mai tā 'ōrua vahine. ’Ua 'ite au, tē māuiui nei tō 'orua māfatu, tē maui ato'a nei ’o pāpā 'ū. I uta roa i roto i te fa'a nō 'Orofero, tē vai ra te hō’ē tao'a huna. E To'ere feti'a pirū, tē vai ra te peu tahutahu i roto i tāua tao'a nei. 'Aita te mau ta'ata i ’ite i hea i te tāpunira'ahia. E 'imi noa rātou i te pō ’e i te ao e, fa'a'ati roa atu ai i te fenua nō Tahiti nei. ’Ua fa'aru'e te mau ta'ata i ta rātou mā'imira'a nō te mea, ’ua rohirohi roa rātou. Hō'ē ra ta'ata tei 'ite tei hea roa te To'ere.

Ani atu rāua : O vai ia?

Pāhono a'e ra te pāpā rū'au : O vau ho'i ! la hāruru te ta'i ’o te To'ere i roto i te fenua, e fa'aro'o te mau ta'ata i teie To'ere.

I te mahana i muri mai, pohe atu ra te pāpā rū'au. Ta'i noa atu ra ’o Tū ’e ’o Maui pauroa te mahana. ’Ua parau a'e ra ’o Maui ia Tū e fa'aea i te ta'i : E pāruru noa o pāpā'ū ia tāua E 'imi tāua i te tao'a manamana e vai ra i uta roa i roto i te fa'a nō 'Orofero.

’Ua pāhono atu ra o Tū e : Ananahi, e haere tāua e 'imi i taua tao'a nei. E ha'uti tāua nō te hanahana nō tō tāua pāpā'ū.

Haere atu rātou i ni'a i te mou'a nō te 'imi i te hō'ē fa'a. Tōna i'oa, ’o 'Orofero. 'Aita rāua i tamā’a noa a'e e piti mahana te maoro e 'aita rāua i ta'oto noa a'e.

’Ua parau atu ra o Tū : Tē vai ra te hō'ē tumu 'uru i'ō.

Pa'uma atu ra ’o Maui, i ni'a i tāua tumu 'uru ra, pāfa'i iho ra i te mā'a 'uru, tunu e tāmā'a a'e ra rāua. Tē vai ra te hō’ē pua’a ‘oviri i mua iā rāua. ’Aita rā rātou i ’ite a’e. Fa’aro’o atu ra rāua i te hō’ē ’ama’a i fati e, fāriu atu ra rāua i muri. Tē vai ra hō’ē pua’a ’ōviri. Horo atu ra rāua nō te mea, ’ua a'ua'u te pua'a'oviri ia rāua. Horo atu ra rā rāua i roto i te fa'a. 'Aita rā rāua i 'ite e, tei roto rāua i te fa'a nō 'Orofero. Horo horo atu ra rāua, 'aita ra i māoro, ’ua topa o Tū i roto i te hō'ē 'apo'o. Tuō atu ra o Tū ia Maui nō te haere mai e tauturu iāna. ’Ua tae mai te 'animara taehae, ri'ari'a atu ra o Maui, 'aita atu ra ’ōna e hina'aro e haere e tauturu ia Tū. Auē e, tāpāru atu ra o Tū ia Maui nō te haere mai e tauturu iāna, nō te huti ho'i iāna i rāpae. Noa atu te ri'ari'a rahi o Māui, haere atu ra e ti'i ia Tū.Tāpiri atu ra o Maui i terā 'apo'o, a'ua'u atu ra te pua'a nā muri iho iāna. Rave atu ra o Maui i te hō’ē rā'au i mua iāna e, horo ato'a 'ōna nā mua i terā 'animara nō te tāparahi i teie pua'a. Tapitopito atu ra rāua e, pohe iho ra te pua'a 'ōviri. Haere atu ra o Maui e ti'i i te hō’ē taura purau. Tāora atu ra i te taura i roto i te 'apo'o, mau atu ra o Tū i terā taura e, huti iho ra o Maui ia Tū i rāpae. Haere atu ra rāua i mua. Ia tae rā i te hō'ē taime, ’ua fa'aro'o rāua i te hō'ē piha'a pape e, 'imi atu ra rāua i te reira. 'Ite iho ra rāua e, hina'aro iho ra rāua to'o piti e haere e hopu i taua pape ra. Hopu atu ra rāua, ha'uti iho ra, 'oa'oa a'e ra e, 'ata rahi atu ra rāua to'o piti. ’Ua hopu o Tū i raro e hi'o e mea nehenehe ānei. E, 'ite atu ra 'ona i te hō'ē puhi i raro a'e ia Maui. E mea ti'a pa'i. Haere atu ra o Tū i ni'a e, parau atu ra ia Maui : Tē vai ra te hō’ē puhi i raro ia tāua . Ri'ari'a atu ra o Maui. Rūrū iho ra rāua, ha'avitiviti atu ra rāua i te horo i rāpae. 'Aita rā i maoro, momi atu ra te puhi ia Māui. Horo atu ra o Tū e tāpuni iāna. I muri mai, 'imi atu ra o Tū ia Maui e, tuō haere noa atu ra. ’Ua tāparu a'e ra o Maui ia Tū nō te haere mai e tauturu iāna inaha, 'era ‘ōna i roto i te tino o te puhi. Mea puai roa o Tū. Eita 'ōna e ri'ari'a e, haere atu ra ‘ōna e ti’i i te hō’ē ‘ōfa’i ‘oe’oe.

Horo ato'a 'ona nā ni'a iho i terā puhi nō te tāparahi i teie puhi, tāpūpū atu ra o Tū i te puhi e, pohe atu ra taua puhi nei. Haere atu ra o Maui i rāpae. ’Ua 'ite o Tū i te hō'ē mori i roto i te pape piha'a, parau atu ra o Maui ia Tū e haere rāua e hi'opo'a. Hopu iho ra rāua i raro i te pape. Pūai atu ra te mārama, tāpiri atu ra o Tū nō te haere e hi'o e aha terā mea. 'Ite atu ra o Tū, tei raro a'e te mārama, o te hō'ē ia 'ofai rahi. Tārape atu ra o Tū ia Māui nō te haere mai e tauturu iāna nō te amo i terā 'ōfa'i rarahi. ’Ua 'ī roa to Tū ’e tō Maui 'oa'oa i roto i te 'ā'au. Inaha, ’ua 'ite rāua i te To'ere. Haere atu ra rāua i rāpae e, rave atu ra o Tū i te hō'ē rā'au nō te ta'iri i teie To'ere. I to rāua ta'irira'a i taua To'ere nei, fā'aro'o atu ra rāua i te hō'ē reo e pina'ina'i nei mai roto mai i te To'ere : E te mau ari'i, o vau tō 'ōrua ta'ata rave 'ohipa. E parau mai 'ōrua    te mau 'ohipa ta 'ōrua e hina'aro.

Ani atu ra o Tū i te To'ere : Tē hina'aro nei māua e ho'i i tō māua fare.

Tae atu ra rāua to'o piti i tō rāua fare. Ani iho ra o Maui i teie To'ere : Tē hina'aro māua e piti vahine, hō'ē nā'u, e hō'ē nā Tū. I reira ia e roa'a ai te tahi 'utuāfare fa'ahiahia nō māua.

Fa'atupu atu ra te To'ere i teie anira'a na Māui. Ani atu ra o Tū i teie To'ere : E hina'aro ato'a māua e piti fa'a'apu.

Fa'atupu atu ra te To'ere i te 'ohipa i ani mai. Ani atu ra rāua : Tē hina'aro nei māua i te tahi mau ta'ata nō te fa'aea mai i piha'i iho ia māua. I muri mai, parau atu ra te To'ere ia Tū rāua o Māui : E'ita vau e fa'aea i'o nei, e haere vau i teie nei. E ha'amo'e ato'a vau. ’Ua oti tā'u 'ohipa. Ha'amāruuru o Tū rāua o Maui i te to’ere.

'Oa'oa rahi atu ra o Tū rāua o Māui nō te 'ohipa tā te To'ere i rave nō rāua. Inaha te 'ohipa tā rāua i ani, ’ua tupu mau ā. Tamau 'a'au atu ra rāua i te 'ohipa tā te To'ere i horo'a nā rāua e, tae roa atu i tō rāua pohera'a. I terā taime, 'oa'oa roa atu ra rāua.

h
Haut de page

Itereva © 2007